اتجوز تاني...ولا اشيل الدفتر

انصحوني..اتجوز تاني ولا أشيل الدفتر..؟شغال مدرس اعدادي ومراتي في السجل المدني والحياه مره بمبي ومره كوحلي والدخل بنلاعبه شد الحبل مره نشده ومره يشدنا.مراتي عاطفيه تسمع عن مشاكل الشغل وحكاوي زميلاتها وتيجي البيت متاثره ومتنكده خاصه اذا كانت مشاكل خلافات وطلاق.. وغيوره علي راي ستي. زي الفريك مابتحبش شريك.دارت الايام مع ثومه ومعانا وبدات الاحظ انها بتدرس وتذاكر في صمت لم ابدي اي اهتمام اهيه مصلحه واريح دماغي من حكاوي ومشاكل السجل ده باع ده اشتري ده اتجوز دي مسكوها برشوه ده بيرسم علي فلانه وهكذا وفي يوم دخلت المحروسه فرحانه جدا وفي ايدها شهاده وبتصيح بارك لي ياباشا نجحت واستلمت شغلانه جديده من الفرحه والسكينه سرقاني نطيت لفوق ودماغي خبطت في سقف الغرفه المنخفض وده كان نتيجه ارتفاع سعر الحديد فاتبعنا حكايه السقوف المنخفضه لما ظهرنا انحني بدري المهم من الفرحه استحملت الخبطه ..اشتغلتي ايه يامدام...مأذون ياحياتي.. قالتها وفمها مرسوم كالعنقود وانا سمعتها ورحت في غيبوبه عاد وثمود.استيقظت بعد العشاء وكالعاده بعد مناقشات تستطيع اي امراءه ان تقنعك بما تريد حتي انها تستطيع قطف شعره من رمش الشامبنزي..المهم دق التليفون واحد من البلد بعد السلام بيقول عنده فرح ففي البدايه افتكرت انه بيعزمني قال لي لا عايزين المدام تحضر علشان تكتب الكتاب..خدت الصفعه بحنيه بقوا يسالوا الاول عن المدام ماشي..لازم اروح معاها واشيل الدفتر ومع مرور الوقت اتغيرت الحياه واصبح التليفون لا يتوقف خميس وجمعه افراح ونص الاسبوع طلاق مع ان المدام كانت بتتاثر وتتنكد لما تسمع عن حاله طلاق دلوقتي عادي اصبحت كالمنشار طالع نازل واكل. جواز طلاق قابض. وشيل ياباشا رعايه الاولاد والمذاكره وضياع صحتك جريا من شرقها لغربها شايل الدفتر ورا المدام التي زاد وزنها بطريقه ملفته للنظر من الاكل واللحمه غدا وعشا بعد كل كتب كتاب وابو بلاش كتر منه..واصبحت الحياه لا تطاق والعيال سقطت في الامتحانات وده نتيجه المساواه...قولوا لي اعمل ايه اشيل الدفتر ولا...اتجوز تاني.. ؟باشا