زوجتي ريما طردتني قبل الفجر

جلست وحيدا اقرأ واتصفح ما تركته ستي من نصائح للازواج وكنت احسدها علي طول العشره بينها وبين جدي علاقه زوجيه امتدت حوالي سبعين عاما من الحب والالفه ومادفعني هو حاله الملل والاحباط والثبات التي يشعر بها اي راجل هذه الايام.. قلبت صفحات المذكرات فعلا نصايح من دهب للبقاء علي عش الحمام دافء وذات بهجه وفي حاله من التدفق العاطفي اخو سيد العاطفي ماعلينا قرأت واستمتعت بالنصايح منها..ان يمسك الرجل يد زوجته اثناء جلوسهما معا في البيت وان ينظر دائما لعينيهاووجهها اثناء الحديث معها ويحدثها بكلام الغزل ويداعبها قبل اللقاء وخاصه قبل الماتشات المؤجله ويشكر ويمدح ويستحسن دائما في ما تصنعه من طعام ويقف بجانبها نظام تماحيك ويساعدها بقدر المستطاع في اعمال البيت حتي يشعرها انها ليست لوحدها ويبث روح التعاون والمشاركه والود والالفه والحنان...وشوش شوشو عليه اللعنه في ودني علشان اجرب واطبق نصايح ستي وقلت حلو النهارده الخميس آخد اليوم من اوله حب وتمنيت كاي راجل مصري يكون ختامه مسك المهم جلست بجوار زوجتي بعد العصر علي الكنبه نتفرج علي التلفزيون كالعاده ومددت يدي وحياه النعمه الشريفه بالراحه بعدما نظرت اليها وما ان لمست يدي يداها وكأن ماس كهربائي اصابها وسمعت شهقه ونفره وسحبت يدها بسرعه البرق ونظرت بتحفز واستنكار واستعجاب واستغراب وكأني مصاب بالجرب الوبائي او الجزام وقالت..هي ناقصه تلزيق الكنبه واسعه ولا شوفلك مكان تاني حبكت..بلعت ريقي وقلت لنفسي عديها وبدأت احادثها عن العمل وامها واثناء الحديث تعمدت منتبها وان تكون عيني في عينها وفجأه قالت لي انت ايه حكايتك انت بتبحلق فيا كده ليه..انت بتشبه عليا...هو انا جايه مع مدحت صالح من كوكب تاني...بلعت ريقي وقلت في نفسي خفه الدم دي من كتر شرب الميه اصبر وعدي يومك ياباشا صبرت كتير طول الاسبوع وماسك نفسك من اللي بتشوفه في الشارع والشغل والمترو والتلفزيون وكاتم علي قلبك.اصبر هانت..المدام دخلت المطبخ تعمل لنا كيكه عقبال عندكم كل حين ومين لما تفتكر والمزاج يبقي عالي ومن طيبه قلبي قلت دي اشاره لمسك الختام الليله وتشجعت ودخلت المطبخ لعمل جو من المشاركه واول ماشافتني عينك ماتشوف النور ياباشا صاحت انت عارف الديك الفيومي ساعات بيبقي من غير ريش في رقبته صياحه مختلف شويه عن الديك العادي ودي خبره ستي قالت لي زمان اول ماالزوجه تقلب فيومي خدلك ساتر واترك المكان او انبطح ارضا باسرع وقت.الله يرحمك ياستي .صاحت المدام لا.لا.لا اخرج بره مابعرفش اعمل حاجه وانت جنبي ده دخول الرجاله المطبخ زي دخول الضره البيت بيغير طعم الاكل ونذير شؤم اديني مقاس كتافك لو سمحت واشارتك خضرا..بلعت ريقي وقلت كده كده قالت وابو كده قلت لنفسي هانت ياباشا اصبر العيال هتاكل الكيكه وتنام والحساب يجمع اصبر ماجتش من كام ساعه نكد ماأنت مستحمل طول الاسبوع وطول الشهر وطول السنه وطول العمر..تسلم ايديكي ياحياتي احلي كيك ربنا مايحرمنا منك طبعا الكيكه زي العيش السحله ومش قابه بس اهو كان نوع من التلطيف للجو واللف حوالين التراك ردت المدام علشان تعرفوا بنتعب اد ايه ومش حرمينكوا من حاجه...والباشا بلعومه اتخرم من بلع الزلط ماعلينا بلعنا ماهو باقي علي الحلو دقه اخيرا ناموا الاولاد و اصبحنا لوحدنا وقفلنا الباب وانسحبت انا من لساني وقلت ايه الجمال ده ..ايه الرقه دي...ردت بسخريه.. رقه..رقه ايه ياأبو رقه..انت بتاكل رقاق كتير كلمني عربي قمت سكت وعوجت لساني وقلت اييه اللي انا شايفه ده اييه الحلاوه دي.. قشطه ياعمي واغلي من دمي..ليلتنا فل بصلي علي النبي واحب البلدي وسمنتنا بلدي..ردت بعينين مفتوحين ولا عين السيره ولا عين شمس...طبعا انا طول عمري غرقانه في السمنه البلدي واهلي مربيني علي السمنه البلدي.. تعرف منين انت السمنه البلدي ماأنا اللي معرفهالك دي كانت امي...وكان بابا...وكان جوز خالتي المامور..وكانت عمتي الوكيله...وكان فلان اللي كان عايز يخطبني...وكان..وكان..ودخلت في تواشيح وسلسله تفاخر واصول ونسب وحسب وانا ناظر للسقف ومبحلق ولا اريد مقاطعتها طمعا فيما تبقي من دقائق من ليله الخميس واتذكر ايام العزوبيه وايام الخطوبه وايام الزواج الاولي واتحسر واتألم علي حال الازواج وفجأه سمعت صوتا بجواري حطم ماتبقي من احلامي وتطلعاتي سمعت سيفونيه شخير وحدث ما كنت اخشاه نامت زوجتي المحروسه كما تنام معظم الزوجات اولاد العز والسمنه البلدي في بلدي المحروسه ويطردن الازواج عاطفيا قبل الفجر وبحلقت انا في السقف كما يبحلق معظم الرجال في زوجاتهم فالاثنين واحد فالسقف يعني امان وحنيه ودفء بس معظم الزوجات يعتقدون انهم سقف عالي مدهون بسمنه بلدي ويتذكرن سلسله النسب والحسب في المكان والتوقيت الغير مناسب ويتغيرن بعد الزواج وبعد الولاده وبعد العشره.. ارجو ان تعود كل ريمه لعادتها القديمه من الاناقه والجاذبيه والحب والأفه والاشراق ذلك حتي لا يهرب الباشا في يوم راس السنه مع اصحابه وان كان لا يحتفل براس السنه لا يهرب يوم الخميس..عودي ياريمه عودي ياريمه حتي تكون ايامنا كلها خميس وراس سنه..وعلي فكره مذكرات ستي كل الستات حافظينها صم قبل الزواج... علي راي المثل..اللي ماتخشش النار في حب جوزها ..الجنه حرام عليها..وربنا كلام كبير الله يرحمك ياستي

ربنا يهديكي..يادكتوره

هي النسوان جري لها ايه...؟المفروض لما تكبر تعقل وتزداد رجاحه واتزان وتقدير للامور ومضغا للكلمات قبل النطق بها ده اذا كان لسه في حالتنا دي في اسنان...هي النسوان جري لها ايه..؟المفروض كل ماتكبر تزداد وقار وحشمه وتقترب الي الله لان خلاص كام سنه وكام يوم وتقابل وجه كريم ...هي النسوان جري لها ايه...؟ المفروض كل ماتكبر ترضي ربها اكتر وتعمل طاعات اكتر وتنصح الصغيرات وتكون مثل يحتذي به...هي النسوان جري لها ايه...؟المفروض كل ما ترتقي في المناصب او السلم الوظيفي تزداد خبره وحكمه...مادفعني لهذا الكلام هو الدكتور اصبحت امينه محافظه وبدأت قصيدتها بان النقاب والخمار ينقلان الجراثيم في الحجرات المعقمه ..ربما يصح ان يكون راي علمي بحت ولكن يمكن ان يكون هناك ايضا خمار وحجاب مخصص لهذه الحجرات مثل باقي الملابس وسؤالي هل بقيه الملابس لا تنقل الجراثيم...الله اعلم..وقالت سيادتها انها حتي الآن لم تصل لسن الحجاب حتي ترتديه وكان يمكن ان تقول اي اجابه اخري تهربا من السؤال اي اجابه مثل الحجاب ليس فرض والدليل هو كذ وكذا وكذا..او الحجاب فرض وربنا يسهل عن قريب ان شاء الله هرتديه...او لا تعليق والناس تفهم ولكن ان تقول انها لم تصل لسن الحجاب وهي تبدو علي اقل تقدير ومع التزكيه والرافه قد جاوزت الخمسين عاما والشائع وليس الشرعي اننا نقول للبنت اتحجبي تقول لك لما اكبر تقول لك لما اتخرج تقولك لما اتجوز تقولك لما اتجنز واعتقد هذا ما تقصده الدكتوره بعد ان يمضي قطار العمر..هي النسوان جري لها ايه...؟وعندها علي راي ستي..يدور القرد في دفاتره مايلقاش الي شفاتيره وضوافره...هي النسوان جري لها ايه...هل بدايه القصيده في شغل اي منصب جديد تبدأ باراء تتعارض مع الدين او الشرع حتي يرضي فني صاحب العمل ويغضب مني صاحب الدنيا والآذره...ام هي فرقعه اعلانيه وجذب انتباه وتلميع مع العلم بان كل كلمه سنحاسب عليها...هي النسوان جري لها ايه...؟مع ان اسمها لا يوحي باسمها خالص د. مؤمنه كامل...هي النسوان جري لها ايه..؟علي راي ستي..زي روايح امشير كل ساعه في حاله...ربنا يهديكي يادكتوره..والله يرحمك ياستي

صدام يضحك في قبره

حكايه بجد انا صدقتها لاني كنت شاهد عيان..دخلت علي ستي فرحا ومنشكحا والدنيا لاتسعني من الفرحه والانبساط وكاني جبت الديب من ديله ورضيت عني حماتي ونادرا مايحدث في بلادنا لان رضي الحماه ورؤيه الديناصور من المستحيلات سالتني ستي ياما جاب الغراب لسته اخبارك ايه..؟ وكانت علامات الرضا والتشفي وانشراح الصدر وانتفاخ الترقوه تكسوني وكأن هيفاء او نانسي اختاروني من بين الوف الشباب واندفعوا ليقبلوني من غير سبب اعذروني مش عارف اوصف حاله السعاده او كأن امامي طبق محشي سخن من ايد امي في هذا الوقت المتاخر البارد جدا في هولاندا.فرحه مابعدها فرحه كل ده وستي بتغلي وعلي نار وعايزه تعرف سبب فرحي وهناي وعايزه تعرف ازاي ضحك صدام وبدأت كعادتها بالهجوم لتحصل علي التفاصيل و بصراحه صرخت في وجهي ياابن بنتي هي الاموات بتتكلم لما تضحك يامجنون لو الاموات بتتكلم الاحياء مش ممكن يسمعوهم ياحبيب قلبي انت جري لعقلك حاجه مين ضحك عليك تعالي ياحبه عيني واحكي لي وبدأت تضع يدها علي راسي وتقراء آيات من القرآن ظنا منها انه اصابني مس او جن وانا مازلت اضحك وقلت لها باسم كل الشعب العربي من المحيط للخليج ان اليوم كان عيدا قالت ياحبه عيني العيد خلص هو بعد العيد يبقي كعك..؟ياستي افهمي النهارده رجع جزء من الكرامه العربيه النهارده انشرحت النفوس والصدور في البلاد العربيه النهارده بجد الكل حاسس براحه وانبساط كل ده وستي عامله زي الشاي الليبي كل مايغلي كل مايحلو يابني ريحني وقول لي ايه اللي حصل.النهارده ياستي انضرب رئيس اكبر دوله في العالم مش بصواريخ كوريا ولا صواريخ ايران ولا صواريخ حزب الله ولا بصواريخ حماس ولا صواريخ روسيا تصوري ياستي انضرب بالجزمه العراقيه يعني بالسباطه او الكندوره او زي مابنقول عندنا بالمداس او بالبولغه اتعدلت ستي وفتحت عينيها الضيقه كمل كمل ياحبوبي تصوري ياستي مانضربش في اجتماع ثنائي او اجتماع مغلق او في مكان للمحادثات المغلقه تخيلي في مؤتمر صحفي وجميع القنوات شاهدته واللي مايشتري يتفرج وماربك بظلام للعبيد وكما تدين تدان..وتلك الايام نداولها بين الناس..ولك يوم ياظالم وكأنه القدر يريد ان يزيد اسبوع العيد يوما آخر ويكون ختامه مسك للامه العربيه فكما حزنت لاعدام صدام في يوم العيد فرحت ايضا في آخر ايام العيد بضرب بوش بالجزمه وكما سمحت القوات الامريكيه بتعليق الحذاء علي رقبه تمثال صدام ليراه العرب وتهان كرامتهم شاء ربك ان تنقل الفضائيات ضرب بوش بالحذاء ويراه كل الامريكان والعالم وسبحان مدبر الامر وسبحان من يمهل ولا يهمل ويشفي صدور قوم مؤمنيين واذا كان بوش احزن العرب في عيدهم فشاء الملك الجبار ان يفضحه ويعود في ايام الاستعداد للكريسماس والسنه الجديده لبلاده ولشعبه يحمل فضيحه وكابوس في آخر ايامه وسيظل ذكري يتندر بها ويتذكرها كل العالم فهو هديه وكارت معايده ومكافأه نهايه الخدمه وما اجملها هديه جزمه عراقيه بغداديه اصليه مش تايوانيه وستقال النكت ولن ينام العراقييين هذا الشهر وستكون الجزمه هي موضوع كل بيت وكل مقهي وكل اجتماع وفي كل البلاد وستظهر العاب البلاي ستيشن للاطفال فيها ضرب بالجزمه وارجو من كل عراقي ان يطلق علي مكان الحادثه ميدان الجزمه او ساحه او شارع الجزمه ليكون شاهدا وتعرفه الاجيال ويكتب في التاريخ ويحكيه كل اب لابناؤه هنا رجعت الكرامه العراقيه..هنا انذل واهين من اهان العرب..هنا الجزمه العراقيه وعلي كل مسؤل عراقي ان ينتبه اذا تحدث مع مسؤل امريكي الا ينظر لحذائه حتي لا يعتبرها الامريكي شتيمه واهانه فنصيحتي ان يخلع العراقيين الاحذيه علي باب الاجتماعات ويخشوا بالشراب..ولن يرفع بوش صوته امام زوجته ولا حماته مره اخري فيكفي ان تنظر احداهما او تشير الي حذائها ليفهم ماتعنيه ويخرس خالص..كل مايقلقني ماذا لو تم محاكمه الصحفي في امريكا ووقف في المحكمه امام القاضي وساله القاضي ما جريمتك سيرد الصحفي اني ضربت رئيسك بالجزمه واذا سكت الصحفي ونظر الي اسفل قدميه فستكون الاجابه مكرره...سياتي العيد القادم ويتذكر العرب الصحفي وصدام ويتذكر العالم وامريكا بوش والجزمه وذهب العراقي لقبر صدام وحكي له حكايه الجزمه فضحك صدام وضحك العراق وانتقل الضحك لايران وسوريا والصومال وقهقهت روسيا وكوبا وكوريا والشيشان وظهرت هيستريا الضحك في افغانستان وتم الغاء صفقات الاسلحه وتهاتف الجميع علي الجزم العراقيه الاصليه علي راي مثل ستي.. لقمه الحبيب خروف وجزمه العراقي صاروخ..الله يرحمك ياستي