هتجوز تاني وتالت ويمكن رابع يعني حسب الظروف وحسب امكانياتي وحالتي الاجتماعيه و الصحيه والماديه وسعادتي هتجوز تاني وتالت ويمكن رابع حسب الشرع وحسب الرخصه وهحاول اعدل بينهم بقدر المستطاع...هتجوز تاني وتالت ورابع وهاخد ثواب علشان هحل مشكله العنوسه وهاستر مسلمه واكون عيله وآخد ثواب...هثجوز تاني وتالت ويمكن رابع وان شاء الله هخلف اولاد وبنات واعمل عزوه وحسب ونسب وكل مايروح احفادي الجامع للصلاه او لحفظ القرآن او يعملوا حسنات وكل ده هيصب في ميزاني...هتجوز تاني وتالت ويمكن رابع وهتباهي في الدنيا بين اهلي واصحابي وجيراني واتباهي يوم القيامه باولادي وزوجاتي واحفادي...هثجوز تاني وتالت ويمكن رابع ومش هقول لمراتي وده طبيعي لانها مش هتوافق ومين في الدنيا حتي لو بتشرب المر بالشاليموه هتوافق ومين في الدنيا هتوافق حتي لو جوزها موريها النجوم بنظاره المغربي ولينز اخضر نهارا وازرق ليلا ..ومين هتوافق علي راي ستي العقربه والنار ..ولا الضره في الدار. وبعدين بعض العلماء قالوا واجازوا الزواج بدون اذن الزوجه الاولي وده منطقي لانك ممكن تحضن الشمس وتبوس النجوم وتربي الديناصور في البلكونه وتتغير الحكومه كل ده ممكن انما حصولك علي الاذن ده لما تشوف اذنك بدون مرايا يافالح طبعا ولا مقطوعه قدامك ومنطقي كمان لان لو الحكايه بالاذن ماكنش حد اتجوز اتنين واصبحت كيداهم وست الحاره الحاكم الآمر الديكتاتور المتسلط ينهي ويامر ويذل اجدع شنب ياااه ده ربنا رحيم ياجدعان بشكل الحمد لله الحمد لله وبعدين شكلها حست وقرات افكاري كعادتها وشدت الغطا. اتقلبت انا علي جنبي الشمال احنا علشان اتخانقنا واختلفنا بالنهار مااحنا طول عمرنا بنتخانق ونفرج علينا القاصي والداني اشمعني المره دي كل مره كانت بتيجي في ضهري ماشي في عيني احيانا ماشي انما المره دي جت في كرامتي علشان كده قررت اتجوز تاني وتالت ويمكن رابع بس حاسس اني بسرق حاسس اني بهدم احلي معبد وبحرق احلي ذكريات واجمل حب غصب عني كرامتي ياستي ياابن بنتي يابخت من قدر وعفي عديها المره دي اللي تعرفه احسن من اللي ماتعرفوش الاصيل دايما كبير وبشر جوز الاتنين بالهم والنكد والدين ياابن بنتي جت العازبه تشكي لقت المتجوزه بتبكي ياابن بنتي علي راي المثل ...جعران عشق خنفسه و خلع لها توبه و بنى لها قصر و شال لها طوبه ما يوافق الراجل إلمتجوز الا مجنونه بنت مجنونه... مش عارف ياستي نزوه ولا وزه شيطان طب العيال هتعمل ايه وذنبها ايه هتفضل شبح يؤرق منامي وذنب كبير يملح حياتي.الكلام ده لكل راجل وكل ست في بلد ستي مرات العمده وناظره مدرسه الحياه اللي طرحتها جت في عيني وقالت لي..حط ايدك على عينك زى ما توجعك توجع غيرك...
. ضربت الشمس في عيني وفتحت نص عين لقيت الفطار علي صنيه وداخله بيه بتحيه الصباح مع نص ابتسامه مستحيه وداعبت نخاشيشي ريحه الطعميه ونسيت الخطه القوميه..
المشاركات
ليست هناك تعليقات:
إرسال تعليق