24 ديسمبر 2009

بابي..مامي..انا انتحرت


احساس مختلط وليس المقصود اسم الزمالك القديم ولكنه احساس مرير ولونه احمر مش اهلاوي ولكنه اصفر بلون المراره نفسها مش اسمعلاوي احساس بالحسره والوجع والله معرفش اصف هذا الاحساس الذي تملكني وانتابني عند قراءه خبر ان شاب مصري في الشارقه احب فتاه فلسطينيه وذهب لمقابلتها لانها لا ترد عليه ومكث تحت شباكها او بلكونتها ولم ترد عليه واطفئت النور ونامت فقام الشاب بحرق نفسه ليعبر عن حزنه وحبه وانتقل للمستشفي وفارق الحياه وفي التفاصيل المزيد بعد الفاصل علشان تعبت في ظبط كوب الشاي ابو نعناع وخايف عليه من البرد الذي قابلني عند العوده الي هولاندا وعواصف التلج والمدينه كلها تكتسي بالون الابيض لون قلب د. بطرس غالي ولون قلب د. الجمل ولون قلب د.حاتم الجبلي قلوب بيضا زي الفل ماشافتش ولا شالت الهم ولا السواد اللي شايفه الشعب ودرجه الحراره تحت الصفر بخمسه يعني ممكن انام في الفريزر ادفي من المشي في الشارع اوالجلوس تحت بلكونه جوليت الشارقه..عدنا..يقول الخبر انه كان يحبها وتركته واحبت اعز اصدقاؤه وانها ليست فوق الشبهات.. وجدت نفسي اسال نفسي شكلها ايه الغندوره دي فرد يعني زي مابيقول الكتاب ولا عود فلاحي مدهون بسمنه بلدي مرمله ولا ملكه جمال مدلعه ياتري شكلها ايه ودخل عقلي الباطن في تخيلات وساعده في ذلك شوشو افندي(الشيطان) ورسم تفاصيل وراحت اشباح وجت اشباح بملابس وروائح وتسريحات وحركات دلع ودلال واقتربت مني واحببتها وعشقتها وقالت بحبك وصدقت كلامها وسرحت اكتر والشاي برد وانا كمان تلجت وفاجاه لقيتها في ايد واحد تاني يانهار اسود اعمل ايه اولع في نفسي ده انا بخاف من الكبريت ده مره لعبت بالكبريت وانا صغير ولعت العلبه كلها خدت علقه ماخدهاش حصان في مطلع وتاني يوم الصبح غيروا فرشتي وغسلوا المفرش البلاستيك اللي كان تحت الملايه.واحد بيسالني ليه. افسر اكتر من كده. وبعدين ازاي الشاب ده ولع في نفسه هل كان في غيبوبه العشق ومخدرا ومنتشيا من اخمصه حتي راسه بالحب هل كان مغيبا وغائب عن نفسه وعقله واحساسه الخارجي ولم يشعر بالام الحرق في بدايتها.هل يفعل الحب والعشق هكذا.. سمعت عن مجنون ليلي اتجنن ماشي بس ماحرقش نفسه. ايه المصيبه المدخنه دي. وهل توجد امراءه تستحق هذا..طيب فين بابا وفين ماما وفين الصداقه والتقارب بين الاباء والابناء وحل المشاكل والنصح اول باول .هل الموت منتحرا ضريبه وتمن دفعه بابا وماما المغتربين والمنهمكين بجمع المال علي حساب الابناء..هل الرفاهيه واغداق المال علي الاولاد لنعوضهم البعد عنهم وهم وخطا كبير وسياتي يوم نندم فيه علي تقصيرنا ...هل فقدان التربيه الدينيه وترك الحبل للبنت والولد علي الغارب بحجه لما يكبر ولسه صغيره هي السبب...هل ابتعاد الاب وعزل الابن في حجره ومعه التليفون واللاب توب وترك الابنه مع الشات والفيس بوك حتي الفجر وسهر الام امام التلفزيون وانشغالها عن الاولاد هو السبب قالوا زمان ان كبر ابنك خاويه..اي اجعل بمثابه الاخ اقترب منه واحكي له وانصحه وانزل لمستواه وسنه وازرع فيه القيم والدين والصراحه وكن له اخ وصديق قبل الاب وخاصه في السن الحرجه وكذلك البنت.قالت ستي زمان دلع ابنك يعزك ودلع بنتك تعرك..لا ياستي دلوقتي الدلع معناه اتغير اصبح دلع بعدم طاعه وعقوق... اصبح دلع بموبايل وجينزمحذق ووشم علي الكتف والصره... اصبح دلع بمصاحبه البنات والسهر وحريه وايزي وانتيم وعرفي وقطع الورقه... اصبح دلع ببجاحه وتشويح وعلو صوت وهي دماغي كده وطلبت كده...وقولتي زمان ياستي..خلف يشرف..وخلف يقرف..وخلف يجيب العار للدار .والايام دي الخلف الاولاني اختفي الا مارحم ربي....خد ابنك وبنتك في حضنك وضلل عليهم بدينك وبعلمك وبحنانك وبخبرتك وبصداقتك وبصراحتك خدهم قبل ما ينتحروا...علي راي ستي...الشجره اللي ماتضلل اهلها تستاهل القطع من جدرها.....الله يرحمك ياستي


ليست هناك تعليقات: