بصراحه كده الحياه اتغير لونها من الفواتح للغوامق ومن المنقرش والساده للمضلع والكروهات ولم تعد حلوه كما كانت ولم تعد آمنه كسابق عهدها وطارت البركه من الايام ومن الرزق مع ان الناس والايام كما هي ولكن حدث شيء ولا ادري ماهو.. طلعت في دماغي لان الجواز حياه تانيه والتفكير فيه متعه ويروش والاستعداد له حلو ومر طعم العسل والدخول فيه فتح مبين وعبور من الباب الملكي للمحيط..عايز عروسه متعلمه وفاهمه الدنيا ماشيه ازاي تعرف تطبخ اهم حاجه ومدبره وكمان تذاكر للعيال وتاخد بالها مني ومن امي اذا كان عاجبها تكون بنت حلال عايزه تعيش وتكن وتعمر زي الحمام والقمري وماتكنش رغايه وكمان تحب الكوره وزملكاويه علشان انا اهلاوي اتحنجل واتمخطر واجيب اجوال وبنات والبيت يبقي ابيض واحمر و فيه حياه عايزها تفهم في السياسه والاقتصاد تتكلم بقدر ما من الثقافه في اي موضوع وما تلكش وتحرق جاز علشان مابحبش الدوشه عايزها تنصحني وتسبني انا آخد القرار..عايزها شيك وتملا عيني ولبسها حلو وبسيط داخل البيت ولها عطر مميز وجذابه وبسيطه في كلامه وتعبيراتها وضحوكه وتجاملني اذا ضحكت ولا تكون كالصعيديه التي حكي لها زوجها نكته فكان ردها هيي..هيي هييي بايخه وكان رده هاهاها طالقه..اريدها ام واخت وزوجه وصديقه دافئه وحنون تحكي وتسامرني ليلا...ولا اريدها تحدثني ليلا عن حديد عز ولا تحدثني عن هشام طلعت وسوزان تميم والسكري وابو صره ولا تحدثني عن الحزب والتغير ونظيف ولا تحدثني عن المدارس والضرب والقتل ولا تحدثني عن الطوابير وفاتوره الكهرباء والتحرش ولا اريدها تحدثني عن القضاء والنقابات والاحزاب ولا تحدثني عن الحرائق والعمارات والعبارات الغرقي والمخطوفه والتائهه ولا تحدثني عن سحابه الدخان وفيروس سي ومرضي السرطان ومنه لله اللي كان السبب..ولا تحدثني عن بيع البلد بغمض عينك تاكل ملبن ولا تحدثني عن اسعار الفول والعدس والخضار واللي تنشك اللحمه ولا تحدثني عن مؤتمرات القمه والدول المايعه ودول الاعتدال الملتوي..ولا تحدثني عن التواطيء والخيانات ولا تحدثني عن حوادث وطرق القتل الجديده..عايزها زوجه تدللني وتخدرني وتنسيني اسمي وتعيدني الي الماضي كل ليله وتحكي لي عن بلدي مصر النيل والقناطر واسوان تحكي لي عن الخضره وحمص الشام والوجه الحسن تحكي لي عن القلعه والحسين وشط اسكندريه والطيبه ونقاوه الصدور وبشاشه الوجوه تحكي لي عن النخيل وصواني القلل القناوي في الشبابيك وصوت عبد الباسط عبد الصمد يزغرد في الفضاء تحكي لي عن غناء البنات وتمايل الزرع الاخضر ودوران الساقيه ورائحه الطعام..اريدها بنت مصريه بلديه حاجه كده متوصي عليها او وصايا او علي الفرازه او زي مابيقول الكتاب او بنت بحق وحقيقي ماجابتهاش ولاده يعني شملوله..عايزها ماتدقش علي الصغيره والهايفه عايزها عاقله ومش بتاعه سماع اغاني وكليبات وجيز وقصير وتي شيرتات واهم حاجه تكون هاديه وعارفه دينها...فجاه سمعت صوت كالرعد خرم طبله ودني وخبط اسناني في بعضها..ايه انت بتستعبط ايه انت بتطلب المستحيل.مافيش شبيك ولا لوبيك انا هستقيل...اللهم اجعله خير صحيت من النوم مفزوع وريقي ناشف..حد ياكل مكرونه الساعه 2 بالليل وينام...؟
المشاركات
