نفسي احضن وابوس ظابط مخابرات شارب من لبن امه يروح يقبض علي صاحب العباره والهاربين بقروض البنوك...نفسي احضن وابوس مسؤل كبير يجري ويخلص مشروعات البناء لبيوت الشباب...نفسي احضن وابوس مسؤل محترم ياخد قرار شجاع في مساله الدراسه وانفلونزا الخنازير...نفسي احضن وابوس مسؤل كبير يريحنا من ردح شوبير وسيديهات مرتضي...نفسي احضن وابوس مسؤل يرسينا في غشاء البكاره ومناديل الجنس الصيني...نفسي احضن وابوس حد يفهمنا العباره في اللقاح والنقاب والكمامه وزياده اسعار الدوا...نفسي احضن وابوس مسؤل يوضح لنا تقرير جولدستون ومجلس امناء هيكل...نفسي احضن وابوس حد يربط لنا بين السحابه السودا وخيبتنا في المونديال وتصريحات البابا وشيخ الازهر...نفسي احضن وابوس حد يفسر لنا مايحدث بنقابات الصحفيين والمحامين والعمال ...نفسي احضن وابوس اللي يبطل يشغلنا بالتوريث والصكوك والضرايب العقاريه وكاس العالم وماتش الجزائر عن الغلاء والبطاله والعنوسه...نفسي احضن وابوس من يفضح عيادات الاجهاض ومراكز الجيمسكس ومستشفيات بيع الاطفال والاعضاء...نفسي احضن وابوس اللي يرضي اهل القتيله ويصرف الديه علي مشاريع تزويج وتشغيل آلاف آلاف الفتيات في بلدنا بدل من سفرهن للخارج...نفسي احضن وابوس مسؤل كبير يقضي علي الفتنه بين المسلمين والمسحيين للابد...نفسي احضن وابوس اللي قال الكلام ده من زمان
من عهد م القرآن نزل
نزل هنا عمرو وربط
بينا وبينكم ياقبط
عقود وداد متسجله
قرآن محمد قال لنا
عيسي المسيح روح ربنا
والست مريم ستنا
تنزل في اعظم منزله
نفسي احضن وابوس نفسي احضن وابوس ظل لساني يرددها وارتفع صوتي بها اثناء دخول الزوجه ومعها كوب الشاي فارتعدت اوصالها واحمر وجهها وظنت اني اصبت بحاله هياج او سعار جنسي وعادت مسرعه للوراء... يامجنون انت ناسي امك لسه عندنا فارتفع صوتي اعلي واعلي نفسي احضنك وابوسك يامصر
المشاركات
ليست هناك تعليقات:
إرسال تعليق